Над 45.000 студенти ја искористиле владината поддршка за набавка на електронски уреди, информираше премиерот Христијан Мицкоски. Станува збор за ваучери во вредност од 15.300 денари, наменети за купување лаптопи, таблети или персонални компјутери, при што искористеноста достигнала околу 99 проценти.
Според податоците што ги соопшти премиерот, подигнати се меѓу 45.000 и 45.600 ваучери, од кои околу 44.500 веќе се реализирани. Право на ваучер од 250 евра имаа студенти до 29 години, запишани на додипломски студии во учебната 2025/2026 година на државни и приватни факултети, кои можеа да аплицираат во периодот од ноември до декември минатата година.
Мицкоски нагласи дека во изминатите 20 месеци Владата работела на унапредување на условите за студентите, преку зголемување на стипендиите, реновирање на студентските и ученичките домови и обезбедување електронски уреди. Тој додаде дека иако секогаш може да се направи повеќе, ова е максимумот што може да се реализира во моментов.
Премиерот оцени дека комуникацијата меѓу Владата и целните групи е на високо ниво и посочи дека досега немало поголема реализација на вакви мерки од страна на претходните влади, оценувајќи дека состојбата е значително подобрена во однос на минатото.
