Секоја година илјадници луѓе го напуштаат својот дом во потрага по подобар живот – некои бегаат од корупција, други од неповолна клима, а трети едноставно бараат среќа која не ја нашле во својата татковина. Новото истражување на компанијата за миграција „Умзуг-365“ ја истакнува земјата каде што семејствата и иселениците можат да ја пронајдат таа среќа: Норвешка.
Анализата вклучувала 20 различни параметри, меѓу кои квалитетот на здравството, образованието, безбедноста и просечните приходи. Со вкупна оценка од 71,73 од можни 100 поени, Норвешка го освои првото место, потврдувајќи го статусот на земја која нуди стабилен и висок стандард на живот.
Резултатите зборуваат сами за себе. Дури 94% од семејствата во Норвешка се задоволни од својот живот, што е за 11% над европскиот просек. Системот на здравствена заштита е на светско ниво: стапката на смртност на мајките е дури 81% пониска од европскиот просек, додека децата уживаат исклучително здравје – со стапка на смртност само 0,31 на 100.000 живородени до 15 години.
Жителите на оваа северна земја, исто така, уживаат во долг живот: просечната старост достигнува 83,3 години, што е над европскиот просек од 80,5 години. Норвешка редовно се наоѓа на врвот на „Светскиот извештај за среќа“, а минатата година ја зазеде седмата позиција во светот – доказ дека високата среќа не е случајност, туку резултат на континуирани вложувања во квалитетот на животот.
Нордиските земји повторно доминираат на врвот: Финска е прва со 67,79 поени, Данска е втора, Исланд трет, а Шведска четврта. Од друга страна, Обединетото Кралство се најде на 23-то место, додека САД паднаа на рекордно ниската 24-та позиција. Израел, и покрај регионалните конфликти, го зазеде осмото место.
На дното на листата повторно е Авганистан, а веднаш зад него се Сиера Леоне, Либан, Малави и Зимбабве.
Од земјите во нашиот регион, Словенија го држи највисокото место на 19-та позиција, Србија е 31-ва, БиХ на 56-то место, Хрватска 72-ра, а Македонија се најде на 86-то место.
