Дуќанџиите, сопствениците на маркети и трафики се соочуваат со нов, непланиран удар врз нивните буџети. Од 1 март, со стапувањето на сила на Законот за заштита од пушење, тие ќе мора итно да инвестираат во нови шкафови и витрини за складирање на тутунските производи – или ќе се соочат со високи казни.
Новите регулативи строго забрануваат изложување на цигари и други тутунски производи на потрошувачите. „Производите мора да се чуваат во затворени шкафови, кои не се визуелно достапни. Шкафовите не смеат да имаат надворешно осветлување и треба да бидат во боја што не привлекува внимание“, наведува предлог-законот.
За трговците, ова значи огромен и непланиран трошок. Многумина неодамна инвестирале во реновирање на објектите и поставување на витрини и безбедносна опрема, кои сега стануваат практично бескорисни. „Вложивме големи суми, дел од нив преку кредити, и сега ни се одземаат инвестициите. За многу семејства ова е прашање егзистенција“, велат трговците на мало.
Додатно, казните се високи: одговорните лица во маркетите ќе бидат казнети со 1.500 до 2.000 евра, а компаниите – во зависност од големината – од 3.000 до 5.000 евра.
Стравот од финансиски колапс веќе се манифестира. Трговците предупредуваат дека ќе бидат принудени да отпуштат вработени, а некои семејни бизниси се соочуваат со вистинска закана за опстанок. Договорите со добавувачи, кои се сеуште активни, ќе мора да се откажат, а брендирањето и уредувањето на продажните простори ќе треба да се менува преку ноќ.
Стопанската комора предупреди дека околу 4.000 малопродажни објекти ќе бидат директно погодени од новите правила. Дел од трговците веќе сигнализираат дека набавката и монтажа на посебната опрема во краткиот преоден период е практично невозможна, особено поради недоречените технички детали за изгледот на шкафовите и специјалните кутии.
