Албанија повторно го отвора TikTok за своите граѓани, ставајќи крај на едногодишната привремена забрана што беше воведена по трагичен настан што ја потресе јавноста. Советот на министри донесе одлука за укинување на ограничувањето, оценувајќи дека ризиците поврзани со јавната и социјалната безбедност во дигиталниот простор се надминати, јавуваат локалните медиуми.
Забраната беше воведена во март 2023 година, по убиството на 14-годишниот Мартин Цани во близина на основното училиште „Фан Ноли“ во Тирана. Инцидентот, кој започнал како конфликт меѓу врсници и ескалирал по комуникација преку социјалните мрежи, ја отвори жестоката дебата за влијанието на дигиталните платформи врз младите.
Иако таткото на жртвата, како и самата компанија TikTok, подоцна истакнаа дека момчето не било корисник на апликацијата, владата сепак реши да преземе радикален чекор и да го блокира пристапот до платформата. Премиерот Еди Рама тогаш јавно предупреди дека социјалните мрежи, особено TikTok и Snapchat, „ги вовлекуваат децата во свои лавиринти уште од најрана возраст“, потенцирајќи ја потребата од поголема заштита.
Со најновата одлука, властите порачуваат дека се воспоставени механизми за подобра контрола и безбедност во онлајн просторот. Укинувањето на забраната ќе стане официјално по објавувањето во „Службен весник“, по што албанските граѓани повторно ќе имаат целосен пристап до TikTok.
