Премиерот Христијан Мицкоски најави поволни вести за македонската економија во однос на извозот во САД. Според неговите зборови, околу 63 до 64 производи, кои се од стратешко значење за земјата, ќе можат да се извезуваат со едноцифрена тарифа, која ќе се движи од 0 до 6,5 проценти.
„Очекувам денеска ова да се потврди со заедничка изјава. Верувам дека ќе бидат донесени поволни одлуки за македонските производи“, изјави Мицкоски во разговор со новинарите, одговарајќи на прашање поврзано со тарифните преговори со САД, додека присуствуваше на поставувањето на камен-темелникот за нова спортска сала во училиште во Карпош.
Мицкоски посочи дека овие поволни стапки се резултат на „интензивни и жестоки преговори“ водени во последните месеци, нагласувајќи дека успехот ќе има значајно влијание врз македонскиот извоз.
