Водата за пиење во Струга и понатаму е небезбедна за употреба, и покрај тоа што најновите анализи покажуваат намалување на заматеноста. Надлежните институции предупредуваат дека параметрите сè уште се над дозволените граници, поради што забраната за користење на водата останува во сила.
Граѓаните се повикани водата да не ја користат ниту за пиење, ниту за готвење, додека не се добијат целосни лабораториски резултати и официјална потврда дека ги исполнува здравствените стандарди. Во меѓувреме, состојбата се следи со дополнителни анализи и мониторинг на квалитетот.
Проблемот започна кога беше измерена екстремно висока заматеност на водата од изворот „Шум“, главниот водоснабдителен извор за градот. Анализите покажаа вредности повеќекратно над дозволените, поради што водата беше прогласена за технички неисправна и опасна за употреба.
Од чешмите во градот течеше темно обоена вода, а здравствените власти предупредија дека не смее да се користи ни за лична хигиена.
Поради сериозноста на состојбата, Обвинителството отвори постапка за утврдување на причините за загадувањето и евентуалната одговорност. Издадена е наредба за увид на терен кај изворите во селото Шум, со присуство на инспекциски служби од областа на животната средина, Агенцијата за храна и ветеринарство и Центарот за јавно здравје.
Истрагата треба да утврди дали станува збор за природна појава, технички пропуст во системот или за можно еколошко нарушување.
Оставка по водната криза
По неколкудневната криза со загадената вода, директорот на ЈП „Водовод“ – Струга поднесе оставка од морални причини, оценувајќи ја состојбата како „катастрофална по здравјето на граѓаните“.
Проблемите со квалитетот и снабдувањето со вода во Струга се провлекуваат со години. Во летниот период градот често се соочува со недостиг на вода, а во останатиот дел од годината редовно се отвора прашањето за нејзината исправност.
Надлежните најавуваат дека јавноста ќе биде информирана за секоја промена, додека водата повторно ќе биде дозволена за употреба само по добивање на официјална потврда дека ги исполнува сите здравствени критериуми.
Случајот отвори поширока дебата за еколошката одговорност, состојбата на водоводната инфраструктура и потребата од долгорочни решенија за безбедно водоснабдување во градот.
