На магистралниот пат Куманово–Крива Паланка, во близина на местото познато како „Смилчинци“ во општина Старо Нагоричане, вчера вечерта се случи тешка сообраќајна несреќа во која животот го загуби 25-годишниот С.Т. од село Нерав, кривопаланечко.
Според информациите од СВР Куманово, несреќата се случила околу 19:05 часот кога возилото „фолксваген голф“ кое го управувал починатиот удрило во скитничко куче, по што излегло на спротивната коловозна лента и се судрило директно со „бмв“ со кривопаланечки регистарски ознаки управувано од Ф.Ј.(27) од село Длабочица.
Во судирот со тешки телесни повреди се здобиле и двајцата возачи, како и сопатничките во „бмв“-то, 20-годишната А.С. и 53-годишната С.Ј., двете од Крива Паланка. Повредените веднаш биле пренесени во Општа болница Куманово, каде што лекарите констатирале смрт кај С.Т.
Телото на починатиот е предадено на обдукција по наредба на јавниот обвинител, додека увид на местото на несреќата извршила увидна екипа на СВР Куманово.
