Во денешната јавна расправа во Собрание на Република Северна Македонија, министерот за дигитална трансформација, Стефан Андоновски, потенцираше дека вештачката интелигенција (ВИ) не е закана за работните места, туку алатка за оние што знаат да ја користат. „Тие кои ја применуваат ВИ ќе напредуваат побрзо од оние кои не ја користат“, нагласи Андоновски.
Министерот објасни дека технологијата веќе се користи во неговото министерство за побрзо и поефикасно извршување на задачи и изработка на анализи, без да се укинуваат работни позиции. „Вештачката интелигенција е ресурс кој ја зголемува ефикасноста, но човечкиот фактор останува незаменлив, особено кога се носат вредносни и етички одлуки“, додаде тој.
Андоновски ги истакна националните иницијативи за развој на ВИ, вклучувајќи го формирањето на Национален центар за вештачка интелигенција и подготовката на македонски јазичен модел за поголема прецизност при обработката на македонски текстови. Тој нагласи дека Владата гледа стратешки на технологијата, вградувајќи ја во националните документи и обезбедувајќи поддршка од Европската Унија и академската заедница.
На прашањето дали ВИ може да ги замени функционерите, Андоновски одговори дека тоа е „погрешен чекор“, бидејќи граѓаните гласаат за политичари со вредносен систем и личен профил. „Сè уште сметам дека луѓето треба да ги водат процесите, особено во политиката“, рече министерот.
Главниот државен ревизор, Максим Ацевски, го претстави извештајот на Државниот завод за ревизија за периодот 2019–2024 година, кој ги анализира подготовките на институциите за примена на ВИ. Тој оцени дека, иако биле инвестирани околу 6,1 милион евра во 48 проекти, тие не се имплементирани во јавниот сектор.
Тој потенцираше дека потребни се јасен регистар на проекти, современ хардвер и обучен кадар за ефективна примена на технологијата. Исто така, оцени дека јавната расправа е важна за подигнување на свеста за значењето на ВИ и за унапредување на услугите што институциите ги даваат на граѓаните.
