Седумдесет и петгодишна македонска државјанка го загубила животот откако била извлечена без знаци на живот од морето во Неа Каликратија на Халкидики, јавува МИА, повикувајќи се на информации од грчката Крајбрежна служба.
Според соопштението, во попладневните часови вчера, крајбрежната управа во Неа Муданија била известена дека 75-годишна државјанка на Северна Македонија била извлечена од морската област кај Неа Каликратија во општина Неа Пропонтида.
Жената веднаш била пренесена со возило на Итната медицинска помош во Здравствениот центар во Неа Муданија, каде што лекарите констатирале смрт.
Надлежните грчки служби започнале предистражна постапка за утврдување на околностите под кои настанал случајот.
По наредба на надлежната крајбрежна управа, ќе биде извршена обдукција во Институтот за судска медицина во Солун, која треба да ги утврди точните причини за смртта.
…
