Управа за јавни приходи соопшти дека пилот-фазата на новиот национален систем за е-Фактура веќе дава конкретни и мерливи резултати, потврдувајќи дека деловната заедница активно се подготвува за преминот кон целосно дигитално фактурирање.
Според официјалните податоци, интересот за тестирање е значителен – 148 компании досега се пријавиле за учество, од кои 57 успешно се регистрирани во системот. Петнаесет компании веќе активно го користат решението во реални услови, при што се издадени вкупно 1.115 електронски фактури. Од нив, 396 се успешно верификувани преку платформата, што, како што оценуваат од институцијата, ја потврдува стабилноста и функционалноста на системот уште во тест фазата.
Од Управата потенцираат дека компаниите кои се приклучуваат во пилотирањето добиваат повеќекратна придобивка – навремена техничка подготвеност пред задолжителната примена, директна комуникација и поддршка при интеграцијата, како и можност со свои сугестии да влијаат врз финалното обликување на системот. Раното вклучување, велат, овозможува полесно прилагодување на ERP решенијата и интерните ИТ системи, со што се избегнуваат потенцијални доцнења при целосната имплементација.
Посебен апел е упатен до ИТ-компаниите, ERP провајдерите и економските оператори кои развиваат сопствени софтверски решенија. Тие се повикани активно да го тестираат API-интерфејсот и преку повратни информации да придонесат во создавањето на стабилен, безбеден и практичен систем што ќе одговара на реалните потреби на бизнис-заедницата.
Процесот на приклучување е веќе отворен преку специјализирани платформи за техничка документација, регистрација и тестирање, а институцијата охрабрува сите заинтересирани субјекти да ги искористат можностите додека системот сè уште е во развојна фаза.
Со имплементацијата на е-Фактура, државата цели кон модернизација на финансиските текови, поедноставување на деловните процедури и намалување на административните трошоци. Од Управата нагласуваат дека партнерството со приватниот сектор е клучно за успешно воведување на системот, кој треба да донесе повисоко ниво на транспарентност и ефикасност во економијата.
