Со порака за светлина, трпение и меѓусебна љубов, Изет Меџити го честиташе почетокот на светиот месец Рамазан, нагласувајќи дека овој период е време на духовна посветеност, мир и зацврстување на заедништвото.
„Рамазан е месец што нè потсетува на трпението, посветеноста и љубовта кон ближниот. Нè доближува до семејството, соседот и секој на кој му е потребен добар збор“, истакна Меџити во својата објава.
Тој посочи дека во Чаир, по улиците на Скопје и во маалата каде што ехо-то од езанот е дел од секојдневието, Рамазан отсекогаш носел посебно чувство.
„Вечерва се чувствува атмосферата во секој дом, во секое семејство и во секој човек“, порача Меџити, додавајќи дека месецот на постот е време кога се зајакнуваат духовните и човечките вредности.
Отворена нова џамија во Фуше Топана
На почетокот на Рамазан, во Фуше Топана беше отворена нова џамија – место за молитва, тишина и благодарност.
Според Меџити, новиот верски објект ќе придонесе за дополнително зајакнување на чувството на заедница, кое, како што истакна, отсекогаш го одржувало градот жив.
„Нека оваа ноќ биде добар почеток. Новата џамија нека биде исполнета со искрени молитви, со чекори на верниците и со мир“, порача тој.
На крајот, Меџити упати честитка до сите верници по повод почетокот на Рамазан, посакувајќи месецот да донесе здравје, благосостојба и спокој во секое семејство.
„Нека Рамазан биде месец на светлина, прошка и добрина за сите.“
