Бугарија доби нова привремена влада предводена од Андреј Ѓуров, откако премиерот и членовите на кабинетот положија свечена заклетва во Народното собрание на Бугарија. Парламентарните избори во земјата се закажани за 19 април.
Во своето обраќање, Ѓуров нагласи дека приоритет на неговата влада ќе биде организирањето фер и транспарентни избори, додавајќи дека управувањето ќе биде без „хистерија“ и без нереални ветувања.
„Нема да ветуваме чуда или историски пресврти за два месеци, туку ќе работиме чесно и одговорно во интерес на граѓаните“, истакна премиерот, потенцирајќи дека главната цел е стабилност во периодот до формирање редовна влада.
Привремениот кабинет постави неколку клучни приоритети, меѓу кои обезбедување финансиска стабилност, подготовка за воведување на еврото и навремена исплата на пензии и социјални надоместоци. Дополнително, ќе се работи на правична распределба на средствата кон општините и подобрување на функционирањето на правосудниот систем.
Ѓуров најави и мерки за зајакнување на безбедноста, транспарентноста на институциите и подобра организација на изборниот процес, вклучително и гласањето на дијаспората.
Тој нагласи дека евроинтеграцијата и евроатлантската ориентација остануваат стратешки приоритет за државата, со јасна поддршка за соработка со Европската Унија, НАТО и Обединетите нации.
„Демократијата не е слоган, туку единствениот функционален одговор на кризите. Изборите се единствениот легитимен пат до парламент што ќе го претставува општеството“, порача Ѓуров.
Тој увери дека привремената влада ќе работи без политички договори и задкулисни влијанија, со цел да се обезбеди мирен и кредибилен изборен процес.
