По протестот на албанската опозиција во Тирана кој ескалираше во судири со полицијата, 17 лица се уапсени, а против 35 се води истрага додека се на слобода, јави RTSH.
Инцидентите започнале кога дел од демонстрантите се судриле со полицијата во близина на кабинетот на премиерот Еди Рама, при што биле фрлани молотови коктели. Полицијата интервенирала со солзавец за да ја растера толпата.
Подоцна, протестот се префрлил кон зградата на парламентот, каде што повторно се случиле судири и фрлање запаливи средства, што резултирало со нова полициска интервенција. Во судирите се повредени повеќе лица, кои се пренесени во болница.
Полицијата истакнува дека протестот не бил претходно одобрен и дека имало информации за можни насилства, со оглед на претходните инциденти. Демонстрантите побараа оставка од владата поради обвинувањата за корупција против вицепремиерката Белинда Балуку.
