Скопје денеска се соочи со сериозен сообраќаен колапс, при што возачи пријавуваат дека чекале и по 30 минути без да можат да се поместат од истото место. Застоите беа регистрирани на повеќе локации низ градот, особено во централното подрачје, каде сообраќајот практично беше блокиран.
Причината за метежот е официјалната посета на претседателот на Албанија Бајрам Бегај, поради што МВР воведе посебен режим на сообраќај на повеќе сообраќајници во Скопје. Полициски службеници беа распоредени на клучните крстосници и булевари, со цел обезбедување на колоните и непречено движење на делегацијата.
На социјалните мрежи граѓаните масовно реагираа, споделувајќи видеа и фотографии од долгите колони возила. Дел од нив револтирано коментираат дека „цел град е блокиран“, додека други прашуваат зошто навреме не биле информирани за затворањата и пренасочувањата.
Од СВР Скопје апелираат возачите да ги почитуваат наредбите на полицијата и привремените сообраќајни режими, нагласувајќи дека мерките се преземаат за безбедност и непречено одвивање на официјалната посета.
Сепак, реалноста на терен покажа дека градот тешко функционира под вакви ограничувања – дел од возачите беа заглавени со десетици минути, јавниот превоз доцнеше, а метежот се прелеа и на споредните улици.
Очекувањата се дека ваквиот посебен сообраќаен режим ќе продолжи и во наредните денови додека трае посетата, па надлежните повторно апелираат граѓаните да користат алтернативни рути и да планираат повеќе време за движење низ градот.
