Енергетските пазари повторно се најдоа во турбулентна зона откако тензиите меѓу Соединетите Американски Држави, Израел и Иран драматично ескалираа, а Техеран испрати заканувачки сигнали дека би можел да го блокира виталниот Ормутски теснец. Станува збор за една од најчувствителните артерии на светската економија – коридор низ кој секојдневно минува околу 20 проценти од глобалната потрошувачка на нафта, како и значителни количини течен природен гас.
Веќе се чувствуваат првите последици. Осигурителните премии растат, бродските компании ги зголемуваат тарифите, а трговците калкулираат со ризик од подолготраен прекин. По серијата напади врз танкери во регионот, сообраќајот низ теснецот е сериозно нарушен, што дополнително ја подгрева паниката на берзите. Цената на суровата нафта Брент во рок од неколку дена скокна за речиси 10 проценти, додека европските пазари на гас реагираа со нагло поскапување.
Најсилен удар засега трпат превозниците. Дневниот наем на супертанкерите од класата VLCC, способни да пренесат околу два милиони барели нафта од Блискиот Исток кон азиските рафинерии, експлодираше на повеќе од 420.000 долари – историски максимум и речиси двојно повисоко ниво од само неколку дена претходно. Тоа е јасен сигнал дека ризикот станува прескап.
Во меѓувреме, пораките од теренот се спротивставени. Иранските власти уверуваат дека преминот е затворен и предупредуваат на можни напади врз бродови што ќе се обидат да минат, додека американски воени извори тврдат дека пловниот пат формално останува отворен. Токму таа информациска магла ја зголемува нервозата меѓу инвеститорите и стравот од нов глобален енергетски шок, кој би можел да има далекусежни економски последици.
