Густ црн чад денеска се издигна над Техеран по серијата воздушни напади врз нафтена инфраструктура во иранската престолнина. Според информации што се шират на социјалните мрежи и во неколку меѓународни извори, силни експлозии и пожари избувнале во складишта за гориво, меѓу кои и во големиот депо-комплекс Шахран, кој сè уште гори.
Снимките и фотографиите од градот покажуваат густ, црн и масен чад кој се издигнува над Техеран, а според сведоштва од жители, чадот бил толку густ што на моменти го затемнил небото над делови од градот.
Според првичните информации, нападите биле извршени од страна на САД и Израел, како дел од пошироката воена операција насочена кон енергетската и воената инфраструктура на Иран. Нафтените складишта се сметаат за стратешки цели бидејќи претставуваат клучен дел од логистичката и енергетската мрежа на земјата.
Пожарите во депоата за гориво создаваат густ чад и токсични гасови, што предизвика загриженост кај жителите на Техеран и околните населби. Спасувачките и противпожарните служби се на терен и се обидуваат да ги стават пожарите под контрола.
Овој напад доаѓа во момент кога конфликтот меѓу Иран, Израел и нивните сојузници се интензивира, со ракетни и воздушни напади кои во последните денови го зголемија ризикот од поширока регионална војна на Блискиот Исток.
Засега нема официјални информации за бројот на евентуални жртви или повредени, а иранските власти сè уште не излегоа со детално соопштение за штетите од нападите.
ВИДЕОТО МОЖЕ ДА ГО ПОГЛЕДНЕТЕ ТУКА
