Рускиот тенисер Даниил Медведев приреди големо изненадување на Мастерс турнирот во Индијан Велс, откако во полуфиналето го совлада светскиот број еден Карлос Алкараз со 6-3, 7-6 (3) и ја прекина неговата импресивна серија победи оваа сезона.
Со оваа победа Медведев ја прекина серијата од 16 последователни победи на Алкараз од почетокот на сезоната, а воедно му ја уништи и шансата да стигне до трет последователен трофеј во Индијан Велс.
Русинот одигра одличен меч и уште во првиот сет направи рано брејк за водство од 3-1, што му овозможи да го задржи ритамот и да го добие сетот со 6-3. Во вториот сет Алкараз поведе со 3-1, но Медведев се врати во игра, израмни на 3-3 и во тај-брејкот освои шест поени по ред, завршувајќи го мечот со ас.
Во финалето на престижниот Мастерс турнир Медведев ќе игра против Јаник Синер, кој во другото полуфинале убедливо го совлада Александар Зверев со 6-2, 6-4. Италијанецот игра одличен турнир и досега нема загубено ниту еден сет.
Финалето во Индијан Велс ветува вистински спектакл, бидејќи двајца од најдобрите тенисери на денешницата ќе се борат за престижната титула на еден од најголемите турнири од серијата АТП Мастерс 1000.
