Иранската државна новинска агенција Мехр објави остро предупредување за можните последици од евентуален напад врз енергетската инфраструктура на земјата, нагласувајќи дека таков развој на настаните би имал сериозни последици за целиот регион.
Во пораката се истакнува дека дури и најмал напад врз електричната мрежа на Иран може да доведе до широка дестабилизација, при што „целиот регион би можел да биде потонат во темнина“.
Како дел од предупредувањето, беше објавена графика со порака „Кажете збогум на електричната енергија“, која прикажува мапа на Персиски Залив со означени клучни електроенергетски објекти во повеќе држави.
Меѓу нив се наведени Саудиска Арабија, Катар, Обединети Арапски Емирати и Бахреин, при што се посочува нивниот капацитет и тип на електрани.
Според објавените информации, дури 70 до 80 проценти од големите електрани во регионот се лоцирани долж брегот на Персискиот Залив, а значителен дел од нив се наоѓаат на помалку од 50 километри од морето. Ваквата географска поставеност, според Техеран, ја прави инфраструктурата потенцијално ранлива.
