Поранешниот претседател на Албанија, Илир Мета, останува зад решетки, откако Специјалниот суд за борба против корупција и организиран криминал одби да му го одреди домашниот притвор. Одбраната на Мета понуди кауција од неверојатни 50 милиони леки, над 50.000 евра, како услов за итно ослободување, но судот не ја прифати оваа опција.
Мета, кој денес го слави својот 57-ми роденден, не се појави на рочиштето. Неговиот адвокат, Кујтим Чакрани, изјави дека поранешниот претседател ја изгубил довербата во судскиот систем и инсистира на директно соочување за суштината на обвиненијата. Чакрани додаде дека правната битка ќе продолжи пред Уставниот суд.
Илир Мета, кој беше на чело на Албанија од 2017 до 2022 година, се соочува со сериозни обвиненија за корупција, перење пари и прикривање имот. Апсењето на актуелниот лидер на опозициската Партија на слободата се случи на 21 октомври 2024 година, по налог на СПАК, што го стави во центарот на вниманието на јавноста и домашната политичка сцена.
