Глобалната авијација се наоѓа пред сериозна криза откако ескалацијата на конфликтот на Блискиот Исток доведе до затворање на воздушниот простор, напад со ракети и беспилотни летала, како и блокада на стратешкиот Ормутски теснец. Последиците се драматични: десетици илјади летови се откажани, авионите се приземјени, а цените на горивата се дуплирани.
Центрите на авијацијата во Заливот, кои со децении функционираат како транзитни хабови за патници од Европа, Северна Америка и Азија, сега се погодени како никогаш досега. Дубаи, со својот Меѓународен аеродром кој во 2024 година пречека над 92 милиони патници и важи за најпрометен меѓународен аеродром во светот, заедно со аеродромите во Абу Даби и Доха, дневно обработуваат преку 3.000 летови. Но, експертите предупредуваат дека сегашната криза го крши овој внимателно балансиран систем.
Моделот на „транзитен центар“ што овозможуваше ефикасен и економичен транспорт на долги релации, благодарение на модерните флоти и поволната географска позиција на авиокомпаниите од Заливот – Емирати, Етихад и Катар Ервејс – сега е сериозно загрозен. Овој систем им овозможуваше на патниците пониски цени на билетите и отворање на нови пазари, но конфликтот го наруши неговото функционирање.
Ако тензиите продолжат, неизбежни се долгорочни последици. Патниците може да почнат да ја избегнуваат рутата преку Дубаи, Абу Даби и Доха, а цените на авионските билети глобално би можеле да пораснат. Додека европските и американските авиокомпании се обидуваат да понудат алтернативни рути, експертите предупредуваат дека ништо не може целосно да ја замени капацитетот на заливските превозници
