Независниот синдикат на државната администрација денеска објави дека во Министерството за економија и труд е потпишан нов Колективен договор, со кој административните службеници ќе добијат постепено зголемување на платите, со вкупно покачување од 21% до 2028 година.
Според договореното, платите ќе се зголемуваат во три етапи: првото покачување од 7% ќе важи од 1 март 2026 година, следното од 7% од 1 март 2027 година, и последното зголемување од 7% од 1 март 2028 година.
Од синдикатот потенцираат дека покачувањето на платите мора да оди рака под рака со рамнотежа меѓу јавниот и приватниот сектор, како и создавање деловна клима која ќе овозможи и приватниот сектор да го следи трендот на раст.
„Силната економија се потпира на два столба: задоволен работник во приватниот сектор и ефикасен службеник во јавната администрација“, велат од Независниот синдикат на државната администрација.
Покачувањето, како што додаваат, ќе донесе и зголемена одговорност за службениците, со фокус на професионализација на институциите, бескомпромисно спроведување на законите и обезбедување администрација која е сервис, а не бариера за граѓаните и бизнисите.
Синдикатот истакнува дека реформите ќе продолжат со цел создавање достоинствени услови за работниците и зголемување на ефикасноста во јавната администрација.
…
