Претседателот на Црна Гора, Јаков Милатовиќ, денеска пристигна во официјална посета на Република Македонија, што е нов знак на продлабочување на пријателските односи меѓу двете земји.
На церемонија во Вила „Водно“, претседателката Гордана Сиљановска-Давкова ќе го пречека со највисоки државни и воени почести, потврдувајќи го значењето на оваа посета на државно ниво. По протоколарното добредојде, двајцата лидери ќе имаат тет-а-тет средба, по што следува пленарен состанок со делегациите од двете страни, на кој ќе се дискутираат прашања од заеднички интерес.
Посетата носи и конкретни резултати, во рамки на дијалогот ќе биде потпишан меморандум за соработка меѓу младинските совети при кабинетите на претседателите, со цел зајакнување на партнерството и промовирање на младинските иницијативи.
За утрешниот ден е предвидено Милатовиќ да положи венец на гробот на Гоце Делчев во црквата „Св. Спас“ во Скопје, како знак на почит кон македонската историја и културно наследство. Посетата ќе заврши со заедничко предавање на двата претседатели на Правниот факултет „Јустинијан Први“ при Универзитетот „Св. Кирил и Методиј“, каде што ќе разменат искуства и перспективи за развојот на регионалната соработка.
