Во напад во водите на Обединетите Арапски Емирати, ирански сили го погодиле кувајтскиот нафтен танкер „Ал-Салми“ додека тој беше закотвен во пристаништето на Дубаи, јави кувајтската државна новинска агенција, а потоа потврди и Њујорк Тајмс.
Инцидентот се случил кога дрон го погодил танкерот, предизвикувајќи пожар на бродот кој брзо се проширил во околните води. Најголемата грижа беше потенцијалното излевање на нафта, но за среќа, сите 24 членови на екипажот се на безбедно и нема повредени.
Поморските противпожарни екипи брзо интервенирале и успеале да го стават пожарот под контрола, избегнувајќи поголема катастрофа. Мерките за спречување на еколошка штета веќе се преземени, соопштија властите, и предупредија на ризик од загадување на морето поради штетата на трупот на бродот.
Според компанијата „Танкер Трекерс“, која ги следи нафтените бродови, „Ал-Салми“ превезувал околу два милиони барели сурова нафта, 1,2 милиони барели од Саудиска Арабија и 800.000 од Кувајт. Танкерот бил натоварен пред околу еден месец.
Огромниот танкер, долг речиси 335 метри, е произведен во 2011 година од јужнокорејската компанија „Даеву Шипбилдинг енд Марин Инженеринг“, и поради големината и количеството на нафта што го превезувал, инцидентот претставува сериозна закана за поморската безбедност и животната средина.
