Се очекува значително влошување на времето низ целата земја, како резултат на активна циклонска формација, предупредуваат од Управата за хидрометеоролошки работи (УХМР). Следуваат врнежи од дожд низ низините, додека на планинските масиви и повисоките предели ќе се спушта снег.
Метеоролозите нагласуваат дека локално количествата на врнежите можат да бидат обилни и силни, со потенцијал да предизвикаат брзо зголемување на водостоите, особено на помалите реки и суводолиците. Граѓаните се повикуваат да бидат внимателни и да избегнуваат движење по речните корита и суводолиците додека трае нестабилното време.
Исто така, УХМР издаде хидроаларм за денес, со предупредување за можност од излевање на реките. На прикачената мапа, како најризично подрачје е означено централното подрачје на државата, со посебен акцент на течението и околните водни токови на Вардар.
