Светлосното шоу на Ајфеловата кула во Париз го претстави спектакуларното враќање на канадската икона Селин Дион на сцената, оставајќи ги обожавателите без здив. На 30 март, плоштадот Трокадеро се претвори во епицентар на музичка магија, каде илјадници фанови заедно ја пееле нејзината верзија на „Hymne à l’amour“ од Едит Пјаф, изведена претходно на отворањето на Олимписките игри во Париз 2024.
После двегодишната пауза поради реткото невролошко нарушување синдром на вкочанета личност, Дион закажа десет концерти во Париз, кои ќе се одржат во септември и октомври. Веста за нејзиното враќање предизвика вистинска експлозија од интерес, а продажбата на билети се претвори во спектакл сам по себе. Според француските медиуми, ова е „историски момент“, системот за продажба беше изложен на огромен притисок, со 9 милиони регистрирани обожаватели кои се обидоа да обезбедат карти. Во првиот час по објавувањето на видеото, 500.000 луѓе веќе чекаа на официјалната страница, а до следниот ден тој број ја надмина границата од еден милион.
Организаторите се соочија и со над 10 милиони обиди преку „ботови“ кои се користат за препродажба на билети, па воведоа строги проверки за да го спречат црниот пазар. За сите десет концерти се во понуда 330.000 билети, бидејќи арената може да прими по 33.000 посетители вечер, а цените се движат од 89,5 до 298,5 евра. Сцената повторно ќе оживее со гласот на Дион, а Париз се подготвува за музички спектакл што ќе остане во сеќавањето на генерациите.
