Сите бензински пумпи во Франција се најдоа под притисок поради масовното пазарење на гориво откако француската Влада воведе ограничувања на цените, предизвикувајќи остар скок на побарувачката и привремени недостатоци, јавуваат медиумите и Министерството за енергетика.
Според официјални податоци, околу 900 пумпи низ земјата немаат барем еден вид гориво, а околу 700 од нив се под капата на енергетскиот гигант „TotalEnergy“. Компанијата посочува дека проблемите се резултат на логистички прекини, а не на национален недостиг. Сепак, други проценки велат дека дури 1.600 локации можеби се соочиле со краткотраен недостиг поради поскапувањата предизвикани од конфликтот на Блискиот Исток.
Цената на дизелот во Франција достигна рекордни 2,25 евра за литар, а глобалниот енергетски шок се поврзува со американско-израелската офанзива против Иран. Конфликтот во регионот ја загуши клучната нафтена артерија преку Ормускиот теснец, што опфаќа околу една петтина од светската испорака на нафта, и доведе до поскапување на горивото за потрошувачите ширум светот.
„TotalEnergy“ продолжи со ограничување на цените на бензин и дизел до 7 април, бидејќи побарувачката по воведувањето на мерката се зголеми, особено за дизел. Портпаролката на француската влада, Мод Брежон, потврди дека помалку од 10% од пумпите се погодени и дека засега нема ризик од национален недостиг, нагласувајќи дека Франција располага со околу 100 милиони барели стратешки резерви за маневри во случај на проблеми.
Енергетската криза веќе се одразува на пошироката економија: инфлацијата во март забележа раст од 1,9%, најбрз од август 2024 година, а цените на енергијата скокнаа за 7,3% по подолг период на опаѓање, покажуваат податоците на „Insee“.
Извршниот директор на „Шел“, Ваел Саван, предупреди дека Европа би можела да се соочи со поголеми недостатоци на гориво во наредните месеци, особено за авионско гориво и дизел, поради оштетувањата на електраните во Заливот предизвикани од конфликтот во Иран.
Оваа криза исто така ја врати на дневен ред дебатата за енергетската безбедност во Европската Унија. Пред 2022 година, Русија обезбедуваше околу една четвртина од увозот нафта во блокот, но ЕУ значително ги намали набавките и планира целосно да ја укине зависноста од руската нафта до 2027 година.
