Според тајни проценки на американските и израелските служби за безбедност, новоименуваниот врховен лидер на Иран, Моџтаба Хамнеи, се наоѓа во критична состојба и засега не може реално да ја управува државата, велат дипломатски и разузнавачки извори во Заливот до кои дошол и лондонски „Тајмс“.
Информациите, деловно споделени меѓу сојузниците на САД во Персискиот Залив, сугерираат дека Моџтаба е веќе со денови во тешка здравствена состојба и без свест, последица на воздушниот напад во кој загина неговиот татко, долгогодишниот врховен лидер Али Хамнеи. Разузнавачките извештаи тврдат дека тој не учествува во носењето на виталните одлуки на власта, особено во време кога Иран се соочува со историски предизвици.
Како дополнителен индикатор за сериозноста на ситуацијата, аналитичарите од службите забележале активности во близина на градот Ком, започнато е поставување на голем мавзолеј со повеќе гробници, што би можело да означува подготовка за погребување на повеќе членови од иранската владејачка фамилија на едно место.
Иранските официјални претставници веќе потврдија дека Моџтаба Хамнеи бил повреден при нападот во кој, според нивните наводи, загинале и неговата мајка и сопруга. Оттогаш тој не се појавил во јавноста, иако во март беше формално избран за наследник на својот татко на врховната позиција.
Во меѓувреме, државната телевизија на Иран емитуваше писмени обраќања што му се припишуваат на новиот лидер, како и видео материјал создаден со вештачка интелигенција, на кое тој наводно се гледа како анализира карта на израелскиот нуклеарен комплекс во Димона.
Овие контрадикторни сигнали само ја поттикнаа шпекулацијата дека вистинската извршна моќ може да ја преземе Иранската револуционерна гарда, додека Моџтаба би останал на функцијата само формално, без реална контролa врз клучните институции.
Од Вашингтон, американскиот претседател Доналд Трамп изјави дека САД водат разговори со други ирански претставници, но дека нема директни контакти со врховниот лидер, што дополнително го нагласува нестабилниот политички пејзаж во Техеран.
Иранските медиуми, пак, објавија дека погребната церемонија за Али Хамнеи би можела да се одржи во неговиот роден град Машхад, еден од најзначајните шиитски верски центри, додека поширока комеморација се очекува во Техеран, но точниот датум сѐ уште не е соопштен. Утре се комплетираат 40 дена од неговата смрт на 28 февруари, ознака за крај на традиционалниот шиитски период на жалост.
