Македонскиот автомото спорт добива ново име за кое допрва ќе се зборува. Само на 18 години, Стефан Тренески станува првиот возач од земјава што ќе настапува во Формула 4, отворајќи ново поглавје со својот дебитантски настап за тимот ЈМТ Рејсинг.
Неговата премиерна сезона започнува токму овој викенд на легендарната патека Red Bull Ring, место кое важи за едно од најпрепознатливите во светот на Формула 1. Токму таму каде што се испишуваат големите приказни, Тренески ги прави своите први чекори кон врвот.
И покрај жестоката конкуренција, младиот Македонец не крие дека неговите амбиции се далекусежни. Желбата да стане дел од елитата во Формула 1 не е само сон, туку цел кон која веќе храбро чекори.
Шампионатот во Формула 4 оваа сезона опфаќа шест тркачки викенди, при што дел од трките се одржуваат на патеки кои се користат и во Ф1 – дополнителен предизвик, но и можност за докажување на највисоко ниво.
Викендов во Австрија ќе донесе вистински спектакл: 45 возачи ќе се борат за пласман во двете трки, но само 32 од нив ќе обезбедат место во неделното финале.
ВИДЕОТО МОЖЕТЕ ДА ГО ПОГЛЕДНЕТЕ ТУКА
