Во дворот на Црквата на Светиот Гроб, позната и како Храмот на Воскресението Христово во Ерусалим, и денес стои мермерен столб кој, според православното предание, бил расцепен при чудесното појавување на Благодатниот оган во 1579 година.
Благодатниот оган, кој традиционално се појавува на Велика Сабота, за прв пат е забележан во 335 година, а низ вековите се смета за едно од најголемите христијански чуда, кое се случува во присуство на православниот патријарх.
Историскиот настан од 1579 година се случил во време на владеењето на Султан Мурат III, кога, според преданието, на православниот патријарх Софрониј V и на православните верници им било забрането да влезат во храмот. Во внатрешноста останале претставници на ерменската и католичката црква, кои чекале да се појави огнот, но безуспешно.
Во исто време, надвор пред храмот, патријархот Софрониј V, со запалени свеќи во рацете, се молел за Божја милост. Според сведоштвата, во еден момент се појавиле силен ветер и грмежи, по што мермерниот столб се расцепил, а од пукнатината излегол оган кој ги запалил свеќите во рацете на патријархот.
Овој настан се смета за пресвртница по која, според традицијата, церемонијата на примање на Благодатниот оган засекогаш му била доверена на православниот патријарх, додека другите христијански деноминации имаат споредна улога во обредот.
Расцепениот столб и денес привлекува внимание на илјадници верници и посетители, кои го гледаат како симбол на верата и како сведоштво за еден од најпознатите настани поврзани со појавата на Благодатниот оган во христијанската традиција.
