Голем митинг се одржува во центарот на Будимпешта, каде илјадници граѓани излегоа на улиците по првичните сигнали дека опозицијата би можела да оствари значајна победа на парламентарните избори. Атмосферата е наелектризирана, со поддржувачи кои слават, но и внимателно ги следат резултатите кои сè уште се во рана фаза на обработка.
Лидерот на опозициската партија Тиса, Петер Маѓар, им се обрати на присутните, истакнувајќи дека повеќе од 6 милиони граѓани излегле на гласање. Тој им се заблагодари на сите што учествуваа во изборниот процес и изрази „внимателен оптимизам“ за можната победа на неговата партија.
Според првичните податоци, обработени се околу 7 проценти од гласовите, при што Тиса води со 110 пратенички места, наспроти 71 за владејачката Фидес. Засега се очекува три партии да влезат во парламентот – Фидес, Тиса и „Наша татковина“.
Сепак, експертите предупредуваат дека овие бројки не значат конечен исход. Броењето штотуку започна, а прво пристигнуваат резултатите од изборните единици, по што следуваат партиските листи, кои ќе ја дадат целосната слика.
Дополнително, изборниот систем во Унгарија игра клучна улога во конечниот резултат.
Системот, кој беше изменет во периодот од 2011 до 2013 година, е наклонет кон владејачката партија Фидес. Дел од пратениците се избираат по изборни единици каде руралните средини имаат поголема тежина – токму таму Фидес традиционално има силна поддршка.
Еден од најважните елементи е таканаречениот „бонус за победник“, што значи дека партијата која ќе победи во одредена изборна единица не само што го добива тоа место, туку и дополнителни мандати врз основа на „вишок“ гласови. Тоа овозможува партија да освои мнозинство во парламентот дури и без апсолутно мнозинство од вкупните гласови на национално ниво.
Поради тоа, и покрај моменталното водство на опозицијата, конечниот исход останува неизвесен, а вниманието на јавноста и понатаму е насочено кон пребројувањето кое ќе ја одреди иднината на унгарската политичка сцена.
