Градоначалникот на Битола, Тони Коњановски, во интервју за емисијата „Студио 10“ на Телевизија 24 истакна дека во градот се спроведува интензивна градежна и инфраструктурна офанзива со цел решавање на долгогодишни проблеми на граѓаните.
Тој посочи дека Битола има специфична урбана структура, со старо градско јадро и заштитени културно-историски целини, што значително ја отежнува реализацијата на градежни зафати во централните делови на градот.
„Битола е град со старо градско јадро, со улички кои се заштитени со закон, па делувањето таму е многу тешко, но тоа е предизвик со кој се соочуваме“, рече Коњановски.
Тој додаде дека во текот на неговиот прв мандат и првата година од новиот мандат се реализираат бројни инфраструктурни проекти, најмногу насочени кон реконструкција на водоводната и канализационата мрежа.
Според него, токму застарената инфраструктура со децении претставува еден од најголемите проблеми за граѓаните.
„Инфраструктурата е основа за нормално функционирање на секој град и затоа работиме на решавање на децениски проблеми“, истакна тој, додавајќи дека општината има силна поддршка од Владата во реализацијата на проектите.
