Европа има ограничен временски период да ги зајакне своите одбранбени капацитети и да се подготви за потенцијални закани од Русија, изјави началникот на белгискиот Генералштаб Фредерик Вансина во интервју за Le Soir.
Според него, 2030 година ќе претставува клучен и чувствителен период за европската безбедност, со очекувања дека до тогаш војната во Украина би можела да заврши. Вансина предупредува дека Русија ќе располага со меѓу 650.000 и 700.000 искусни војници, што претставува сериозен воен потенцијал.
Тој нагласува дека Европа мора да достигне ниво на подготвеност што ќе испрати јасна порака до рускиот претседател Владимир Путин – дека континентот е способен да се брани дури и без директна поддршка од Соединетите Американски Држави.
„Имаме неколку години пред нас, благодарение на храброста на Украинците, кои практично ни купуваат време. Затоа сме решени да продолжиме со поддршката“, истакна Вансина.
Тој оценува дека конфликтот во Украина моментално е во ќорсокак, но предупредува дека Русија и понатаму одржува силна воена економија и континуирано произведува воена опрема. Дополнително, посочи дека плановите на Москва вклучуваат проширување на армијата на околу 1,5 милиони војници.
Во изјавата се споменува и агресивната реторика за враќање на границите од 1997 година, што би значело намалување на влијанието на НАТО во Централна Европа.
„По завршувањето на конфликтот, Европа мора да биде доволно силна за да ја одврати Русија“, заклучи Вансина, посочувајќи дека ова прашање е тесно поврзано и со актуелните односи со САД.
…
