Хрватската туристичка понуда, особено приватните станови и викендичките, се наоѓа пред значајна промена што веќе предизвикува реакции низ Европа, и тоа иако новите правила сè уште не се финално усвоени.
Според најавениот законски пакет, од 1 јануари 2027 година се воведува задолжителна регистрација за сите приватни сместувачки капацитети во земјата. Секој сопственик што издава стан, куќа за одмор или сличен објект ќе мора да добие единствен регистрациски број преку онлајн систем, без кој нема да може да рекламира или нуди сместување на пазарот.
Оваа промена не доаѓа изолирано. Таа е директно поврзана со регулативата на Европската унија усвоена на 11 април 2024 година, чија цел е подобра контрола на краткорочното изнајмување и размена на податоци меѓу државите членки. Од 20 мај 2026 година, оваа европска рамка ќе почне да се применува, а државите ќе имаат обврска да ја пренесат во сопствените закони.
Во Хрватска, властите веќе го подготвуваат теренот за примена, а според најавите од туристичките институции, по стартот во 2027 година ќе биде предвиден и преоден период за сопствениците да ги усогласат своите објекти со новите правила.
Една од клучните цели на реформата е поголема транспарентност во туристичкиот сектор. Идејата е гостите лесно да можат да проверат дали сместувањето е легално регистрирано, додека платформите како Airbnb и Booking ќе мора да ги отстрануваат понудите без важечки регистрациски број.
Паралелно со тоа, мерките треба да помогнат во сузбивање на сивата економија и нелегалното издавање сместување, проблем кој со години е тема во популарните туристички региони на Јадранот.
Според најавите, новиот систем нема да се однесува на хотелите и камповите, кои и досега функционираат под посебни регулативи.
Иако сè уште се работи за нацрт, веста веќе предизвика немир кај дел од туристите и сопствениците на недвижности, особено кај германските гости, најбројната група странски посетители во Хрватска, кои со години се значаен дел од тамошниот туризам.
…
