За многумина, петок 13-ти не е само датум на календарот – тој е симбол на несреќа, повод за страв и избегнување на било какви ризици. Но од каде доаѓа ова суеверие и зошто комбинацијата од петок и бројот 13 се смета за „опасна“?
Бројот 13 веќе со векови носи лоша среќа. Во христијанската традиција, Тајната вечера имала 13 учесници: Исус и 12-те апостоли. Јуда, предавникот, бил тринаесеттиот на масата, што ја зацврстило негативната симболика на бројот. Денес, тоа се гледа во практични примери: некои хотели го прескокнуваат 13-тиот кат, авиокомпаниите избегнуваат летови со број 13, а некои ресторани едноставно немаат маса број 13.
И не е само бројот 13 проблем. Петокот, историски гледано, имал своја „темна“ страна. Во средниот век, петок бил сметан за погоден ден за егзекуции, а според одредени преданија, токму во петок биле протерани Адам и Ева, а Исус бил распнат. Спојувањето на двата „несреќни“ симбола – петок и 13 – создаде ден кој културно се впиша како знак на лоша среќа.
Историјата е полна со драматични настани што ја засилиле суеверијата. На 13 октомври 1307 година, францускиот крал Филип IV наредил апсење на витезите Темплари, а голем дел од нив биле мачени и погубени. Во нордиската митологија, 13-тиот гостин на вечерата на боговите бил Локи, богот на хаосот, чиј пристигнување довело до смртта на Балдер, богот на светлината. А кога сето ова се комбинира со модерната поп-култура, особено хорор филмовите од серијалот „Петок 13-ти“, стравот од овој датум се вкоренува во колективната свест.
За оние кои сериозно реагираат на петок 13-ти, постои дури и медицински термин: трискаидекафобија. Тоа е специфичен страв кој кај некои луѓе предизвикува анксиозност, избегнување на патувања или одложување на важни одлуки.
Но, не сите гледаат на овој ден како на проклетство. Некои го сметаат за идеален момент да ги предизвикаат суеверјата и да направат нешто ново. Како што вели старата поговорка: „Среќата им оди на храбрите“ – можеби токму петок 13-ти е денот да се фрлите во она што долго време сте го одложувале.
