Секторот за внатрешни работи Битола поднесе кривична пријава против две лица од Битола поради сомнение за сторено кривично дело „злоупотреба на службената положба и овластување“.
Како што информираат од полицијата, првопријавената во својство на поранешна директорка на ЈЗУ Клиничка болница „Д-р Трифун Пановски“, а подоцна и медицински директор во Министерство за здравство, заедно со второпријавената – раководителка на Одделот за интерни болести во истата установа, ги пречекориле своите службени овластувања.
Според наводите, во периодот од ноември 2023 до јуни 2024 година тие одобриле и потпишале исплати за прекувремена работа на 12 лекари, иако тоа било спротивно на одлука на управниот одбор. Исплатите се однесувале на активности поврзани со други одделенија во болницата.
Со ваквите постапки, како што се наведува, било овозможено неосновано исплаќање на средства во вкупен износ од 494.933 денари, со што бил оштетен државниот буџет.
Надлежните институции продолжуваат со постапката за целосно расчистување на случајот.
…
