Русија би можела да го прекине извозот на нафта од Казахстан кон Германија преку нафтоводот „Дружба“ почнувајќи од 1 мај, пренесуваат три индустриски извори за Ројтерс.
Според истите извори, веќе е доставен изменет распоред за испораките до надлежните во Казахстан и Германија. Тие разговарале под услов да останат анонимни.
Односите меѓу Москва и Берлин се значително нарушени по почетокот на војната во Украина, при што Германија отворено ја поддржува Украина.
Од руското Министерство за енергетика засега нема официјален коментар за најавите, додека портпаролот на Кремљ, Дмитриј Песков, изјави дека не е информиран за ваква одлука и дека ќе ја проверат информацијата.
Германија во 2022 година ги стави под државна контрола локалните подружници на руската компанија „Роснефт“, со што постепено се намали енергетската зависност од Русија.
Во 2025 година, преку северната рута на „Дружба“, Казахстан испорачал околу 2,146 милиони тони нафта кон Германија, што е значителен раст во однос на претходната година.
Казахстанската нафта стигнува до Германија преку територијата на Русија и Полска, а дел од испораките се насочуваат кон рафинеријата PCK во Шведт, една од клучните во земјата.
Испораките во изминатиот период често биле прекинувани поради напади со дронови врз енергетската инфраструктура во Русија.
…
