Ерик Трамп се појави во емисијата Mornings with Maria на Fox Business во момент кога, според повеќе медиумски извештаи, неговата компанија Foundation Industries се најде во центарот на внимание поради договори со американски државни институции во вредност од околу 24 милиони долари.
Во студиото, тој настапи заедно со извршниот директор Санкает Патак, промовирајќи ја компанијата како дел од новата генерација технолошки играчи во сферата на одбраната и роботиката. Особен фокус беше ставен на развојот на хуманоидни роботи, кои компанијата ги претставува како алатки со потенцијал за широк спектар примени: од воени операции до цивилни индустрии.
„Ова е трка што мора да ја добиеме“, порача Ерик Трамп, нагласувајќи ја глобалната конкуренција во развојот на напредни технологии. Во истата линија, тој ја опиша американската економија како водечка сила, способна да ја диктира иднината на вештачката интелигенција и роботиката.
Во своите изјави, Трамп се обиде да го ублажи воениот контекст на технологијата, опишувајќи ги роботите како „пријателски“ системи кои реагираат на човечка интеракција: поздравуваат, следат команди и симулираат социјални гестови. Според него, воведувањето автономна вештачка интелигенција би имало далекусежни последици не само за одбранбената индустрија, туку и за секојдневни сектори како угостителството.
Сепак, дел од јавноста и медиумите поставија прашања околу транспарентноста на процесот преку кој компанијата обезбедила државни договори. Според информации објавени од Time, Foundation Industries има добиено истражувачки средства од американската армија, морнарица и воздухопловни сили, а истовремено се споменува и нејзино вклучување во SBIR Phase 3 програмата, што ја става на листа на квалификувани добавувачи за воени набавки.
Дополнителна доза контроверзија во извештаите предизвикува и фактот што компанијата е поврзана со членови на семејството Трамп, додека договорите се реализираат во период кога Доналд Трамп повторно има значајна политичка улога. Критичарите укажуваат на можен судир на интереси, иако во политичките кругови, особено во рамки на Републиканската партија, засега нема пошироки јавни противења.
Во поширок контекст, медиумите потсетуваат и на други деловни потези поврзани со семејството Трамп: од комерцијални производи и медиумски проекти, до криптовалутни иницијативи и маркетинг кампањи поврзани со политички бренд. Дел од тие активности, според критичарите, ја замаглуваат границата меѓу бизнис, политика и јавна функција.
…
