Краток хаотичен судир во трговски центар во американската сојузна држава Луизијана заврши со трагични последици: едно лице го загуби животот, а петмина се здобија со повреди во престрелка што ја потресе Батон Руж.
Инцидентот се случил во попладневните часови во фуд-корт зоната на трговскиот центар „Mall of Louisiana“, кога, според првичните полициски информации, вербална расправија меѓу две групи брзо ескалирала во вооружен судир. Паниката во затворениот простор се проширила за неколку секунди, додека посетителите и вработените се обидувале да се засолнат или да побегнат од местото на настанот.
Во првичниот хаос властите соопштиле дека има десет повредени, но подоцна таа бројка била коригирана: потврдени се пет лица со повреди. Локалната полиција информираше и дека петмина се приведени како дел од истрагата поврзана со инцидентот.
Набргу по пријавата за пукањето, околината на трговскиот центар била преплавена со полициски сили. Десетици возила пристигнале на паркингот, додека над објектот кружеле хеликоптери. Вооружени полицајци со заштитна опрема го обезбедувале просторот и ги пребарувале околните делови во потрага по дополнителни инволвирани.
Сцените од местото на настанот биле драматични. Очевидци опишуваат масовна паника, луѓе кои трчаат кон излезите и вресоци кои одекнувале низ трговскиот центар. „Мислев дека станува збор за терористички напад“, изјавил Алекс Терио, електротехничар кој во моментот се наоѓал во објект на само неколку метри од фуд-кортот.
Истрагата за точните околности и мотивите зад судирот е во тек.
…
