Нови детали од истрагата за вооружениот инцидент во Вашингтон откриваат како напаѓачот успеал да внесе оружје во објектот каде што присуствувал и американскиот претседател Доналд Трамп, отворајќи сериозни дилеми за безбедносните протоколи.
Според официјални извори, 31-годишниот Кол Томас Ален бил регистриран како гостин во хотелот „Вашингтон Хилтон“, што му овозможило да го заобиколи надворешниот безбедносен прстен. Во моментот кога објектот бил затворен за јавноста, неколку часа пред почетокот на новинарската вечера, пристап имале само хотелски гости, акредитирани лица и поканети посетители.
Полицискиот началник Џефри Керол изјави дека токму овој статус му овозможил на осомничениот да внесе оружје без да биде откриен во почетната фаза на контролите.
Сепак, безбедносните служби тврдат дека внатрешниот систем функционирал според предвиденото. Сите околу 2.300 гости кои влегувале во главната сала биле подложени на повеќекратни проверки, вклучително и задолжително поминување низ детектори за метал. Токму овие мерки, според надлежните, го спречиле напаѓачот да влезе вооружен во просторот каде што се наоѓале највисоките државни функционери.
Нападот се случил во лобито на хотелот, каде што осомничениот се судрил со припадниците на Тајната служба. Во салата, пак, бил воспоставен дополнителен безбедносен прстен околу претседателот Трамп, со таканаречена „тампон зона“ што го одвојувала од останатите присутни.
Агентите биле распоредени на клучни позиции, а во готовност биле и специјални противтерористички тимови. Благодарение на нивната брза реакција, Трамп бил евакуиран во рок од неколку секунди по првите истрели.
Инцидентот предизвика паника меѓу присутните, а настанот беше веднаш прекинат и сите функционери беа извлечени на безбедно место. Истрагата продолжува, при што посебен фокус ќе биде ставен на евентуалните пропусти во контролата на хотелските гости и безбедносните процедури.
