Германската полиција утрово започна масовна и координирана акција против групата „Hells Angels“, една од најпознатите моторџиски организации поврзувани со криминални активности во Европа.
Во операцијата, која според властите се вбројува меѓу најголемите од ваков тип досега во покраината Северна Рајна-Вестфалија, учествуваат околу 1.200 полицајци, меѓу кои има и специјални единици. Акцијата се одвива истовремено во повеќе градови, каде што се претресуваат станови, деловни простории и имоти поврзани со осомничени членови и нивни соработници.
Центарот на истрагата е насочен кон огранокот „Hells Angels Motorcycle Club Leverkusen“, кој непосредно пред почетокот на рацијата беше официјално забранет со одлука на Министерството за внатрешни работи во Диселдорф. Според властите, постојат сериозни сомнежи за негово учество во организирани криминални активности.
Полициските тимови дејствуваат на територија од вкупно 28 градови, меѓу кои Келн, Дортмунд, Дуизбург, Бохум, Билефелд и Леверкузен, а под засилено полициско присуство е и клубската локација во Хилден.
Покрај собирањето докази, истрагата има и финансиска димензија: се трага по нелегално стекнат имот, при што властите очекуваат заплена на луксузни мотоцикли, готовина и други вредности поврзани со криминални активности.
Акцијата се спроведува под раководство на полицијата во Диселдорф, во тесна соработка со специјалното обвинителство за организиран криминал (ZeOS NRW). Основата за истрагата е сомневање за формирање и членство во криминална организација.
Германските власти и претходно преземале слични мерки против ограноци на групата. Дел од нив беа и трајно забранети, како случајот со „Hells Angels MC Concrete City“ во 2017 година, чија забрана подоцна беше потврдена и од судските органи.
И покрај ваквите удари, полицијата забележува дека влијанието на „Hells Angels“ во регионот не ослабнало. Напротив, според безбедносните служби, групата неодамна броела околу 29 ограноци со приближно 469 членови, а нивната бројка пораснала и по приклучување на поранешни членови на ривалската моторџиска група „Bandidos“, што дополнително ја зацврстило нивната позиција во Северна Рајна-Вестфалија.
…
