Американските сили на Блискиот Исток се подготвени да започнат нови воени операции против Иран во рок од 96 часа од добивањето наредба од претседателот Доналд Трамп, објави Си-ен-ен, повикувајќи се на двајца неименувани американски функционери.
Според нивните изјави, во регионот веќе се распоредени доволно сили за евентуални напади, чиј обем би можел значително да ги надмине претходните операции против ирански воени цели.
Еден од соговорниците на телевизијата ја опишал можната акција како „голема операција“. Слични процени дале и други сегашни и поранешни американски функционери запознаени со воените планови.
Изворите предупредуваат дека евентуалните нови напади би биле посложени, бидејќи иранските сили во меѓувреме подобро се запознале со американските тактики. Тоа би можело да го отежни погодувањето на планираните цели.
Сепак, според извештајот, Трамп сè уште нема донесено конечна одлука за следните чекори.
Рокот од 96 часа ја опишува подготвеноста на силите по евентуална претседателска наредба, а не потврден термин за почеток на напад. Процените дека Трамп би можел да одобри поширока операција остануваат наводи на неименувани извори.
…
