ФИФА ја освежи европската клупска ранг-листа според која ќе се одредува дел од составот за Светското клупско првенство во 2029 година, а на врвот моментално стои Арсенал. Лондонскиот клуб со 103 бода ја држи првата позиција и ја потврдува својата стабилност во континуитетот од настапите во Лигата на шампионите во тековниот четиригодишен циклус.
Непосредно зад лондонскиот клуб се наоѓа актуелниот европски владетел Пари Сен Жермен со 97 бода, кој веќе има обезбедено место на следното издание на мундијалот за клубови. Францускиот гигант воедно е и единствениот тим од листата што веќе математички ја заверил визата за 2029.
Зад водечката двојка следува густо распоредена група на европски гиганти. Баерн Минхен и Барселона делат идентичен учинок со 92 бода, додека Ливерпул е петти со 78. Интер и Реал Мадрид се движат блиску еден до друг со 76 и 75 бода, а Атлетико Мадрид ги следи со 74. Во првите десет се вклучени и Борусија Дортмунд со 58 и Баер Леверкузен со 57 освоени поени.
Ранг-листата се формира исклучиво врз основа на настапите во Лигата на шампионите во периодот од четири сезони, при што секоја победа, реми и напредување во нокаут-фазата носи клучни поени за клубовите.
Во поширокиот контекст на квалификациите за 2029 година веќе се познати и неколку шампиони од останатите континенти. Меѓу нив се ПСЖ како европски шампион, Ал-Ахли од Саудиска Арабија, Пирамидс од Египет, бразилски Фламенго и мексикански Круз Азул.
За споредба, на претходното издание на турнирот во 2025 година, ФИФА воведе ограничување од максимум два клуба по држава, освен ако не станува збор за континентални шампиони. Тогаш местата на светската сцена ги обезбедија Салцбург, Интер, Јувентус, ПСЖ, Баерн, Дортмунд, Бенфика, Порто и Атлетико Мадрид, додека директен пласман имаа европските шампиони од претходниот циклус – Челси, Реал Мадрид и Манчестер Сити. Првото издание во новиот формат, со 32 екипи, се одржа во САД, а титулата ја освои Челси.
…
