Скопје, 5 мај 2026 – Основниот суд донесе неправосилна пресуда со која тројца полицајци се прогласени за виновни за злоупотреба на службената положба поврзана со работењето на дискотеката „Пулс“.
Судијката Лидија Петровска при објавата на пресудата истакна дека обвинетите Кире Богатинов, Горан Лазаров и Александар Темелков постапувале спротивно на законските обврски, внесувајќи неточни податоци во службени записници. Наместо да ги евидентираат прекршоците кај активната фирма „ММММ Кафе ДООЕЛ“ од Кочани и одговорното лице Митко Стојанов, тие ги заведувале кај неактивната „Класик ДМ ДООЕЛ“.
Судот им изрече условни казни затвор. Богатинов и Лазаров добија по една година затвор, која нема да се изврши доколку во следните три години не сторат ново кривично дело. Темелков доби условна казна од две години затвор со рок на проверка од четири години.
На објавувањето на пресудата не присуствуваа обвинетите ниту нивните бранители, а во судницата беше присутна само обвинителката Спасенка Андонова, покрај новинарските екипи.
Судијката Петровска нагласи дека станува збор за сериозни пропусти, а не за формални грешки, потенцирајќи дека правилното утврдување на субјектот на прекршок е клучен елемент во постапувањето.
Ова е првиот предмет поврзан со дискотеката „Пулс“ кој доби судска разрешница, иако пресудата сè уште не е правосилна. Обвинетите имаат право на жалба до Апелацискиот суд, а дополнително им е изречена обврска да платат судски трошоци во износ од по 7.000 денари.
Покрај овој случај, дел од обвинетите се опфатени и со други постапки што ги води Обвинителството за гонење организиран криминал и корупција. Во еден од предметите, кој неодамна започна, се обвинети 13 полицајци за пропусти при акциска контрола на угостителски објекти, при што не биле преземени мерки за безбедност и спречување на користење непријавена пиротехника.
Во друг предмет, Темелков е дел од обвинение против деветмина полицајци за пропусти при давање согласност за издавање лиценца на дискотеката, и покрај тоа што објектот не ги исполнувал потребните услови.
Во најобемниот случај поврзан со „Пулс“, обвинети се 35 лица и три компании. Судската постапка е во тек, со изведување на материјални докази, а поради сложеноста се очекува да трае подолг временски период. Во текот на мај се закажани шест нови рочишта.
…
