Возач на околу шеесетгодишна возраст починал додека се наоѓал зад волан во населбата Маџари во Скопје, во близина на патот што води кон Кванташкиот пазар.
Според првичните, сè уште неофицијални информации, човекот најверојатно доживеал ненадеен здравствен проблем додека управувал со возилото. Се наведува дека успеал навреме да го запре автомобилот на коловозот пред да ја изгуби свеста.
Настанот бил забележан од случајни минувачи кои веднаш повикале итна медицинска помош. Екипа на брза помош пристигнала за кратко време и се обидела да интервенира, но и покрај напорите, лекарите само ја констатирале смртта.
На терен се очекува и увид од полициски службеници, кои треба да ги утврдат околностите под кои настанала смртта.
Поради тоа што возилото останало на коловозната лента, сообраќајот во тој дел од Маџари се одвива забавено и со повремени застои.
…
