Во Архиепископијата во Никозија беше потпишан договор со кој Кипарската црква донира 15 автобуси за потребите на Националната гарда. Возилата, обезбедени преку договор со компанија-изведувач, ќе служат за организиран и побезбеден превоз на припадниците на вооружените сили до и од нивните единици.
Церемонијата, која се одржа во понеделник, собра високи државни и црковни претставници. Документот го потпишаа архиепископот Георги, министерот за одбрана Василис Палмас и претставник на компанијата што ја реализира набавката. Меѓу присутните беше и началникот на Националната гарда, генерал-потполковник Емануил Теодору.
Архиепископот Георги, во своето обраќање истакна дека Кипарската црква, во рамките на своите можности, континуирано се обидува да одговори на потребите на Националната гарда. Тој нагласи дека одлуката за донацијата е донесена од Светиот синод и ја опиша како дел од поширока поддршка што црквата ја дава на државните безбедносни структури.
„Би сакале да можеме да направиме и повеќе, но делуваме според нашите реални финансиски можности“, порача архиепископот, додавајќи дека ваквите проекти се продолжение на долгогодишната пракса на поддршка на одбранбените потреби на земјата.
Министерот за одбрана, Василис Палмас, од своја страна ѝ се заблагодари на црквата за, како што рече, постојаната грижа за националните интереси и за конкретниот придонес кон подобрување на условите во кои функционира Националната гарда. Тој истакна дека државата останува посветена на зајакнување на одбранбените капацитети и одвраќачката сила на Кипар.
Во неговата изјава беше нагласено и дека безбедносните предизвици остануваат актуелни поради продолженото присуство на турските сили во северниот дел од островот, што, според него, ја прави дополнителната поддршка и модернизација на одбраната неопходна.
Настанот заврши во дух на заемно признание за соработката меѓу државата и црквата, со заедничка порака дека ваквите иницијативи имаат за цел да ја зајакнат подготвеноста и функционирањето на Националната гарда.
…
