На граничниот премин Табановце е откриен случај на организиран обид за шверц на медицински и козметички препарати кои, според надлежните, можеле сериозно да го загрозат здравјето на граѓаните. Во акцијата на Секторот за контрола и истраги при Царинската управа се лишени од слобода три лица, меѓу кои и сопственичка на салон за убавина.
Сомнежите за нелегална дистрибуција започнале откако при влез во државата било запрено комбе подложено на детална царинска контрола. Во возилото, внимателно скриени меѓу чаршафи за постелнина, биле пронајдени 535 вијали со препарати за слабеење, како и илјадници етикети со ознаки „TIRZ 2,5 мг“ и „TIRZ 5 мг“.
Истрагата утврдила дека возилото било следено од мобилен царински тим сè до моментот на предавање на пратката, каде што била извршена интервенција и приведување на осомничената сопственичка во моментот на наводна исплата.
По налог на јавен обвинител, бил извршен и претрес во нејзиниот козметички салон. Таму инспекторите откриле дополнителни количини на недокументирани производи, меѓу кои дермални филери, средства за нивно разградување, препарати за намалување масни наслаги, за обликување на лицето, измазнување брчки и третмани за подмладување.
Според првичните наоди, пронајдените производи немале никаква документација за безбедност, потекло или законски увоз, а постојат сомневања дека дел од нив биле активно користени и рекламирани во третмани на клиенти.
Против сите инволвирани лица е поднесена кривична пријава до надлежното јавно обвинителство, за сомнежи поврзани со шверц и производство, како и пуштање во промет на штетни средства за лекување.
Од Царинската управа порачуваат дека контролите ќе продолжат со засилен интензитет, со цел заштита на јавното здравје, и предупредуваат дека секое незаконско постапување ќе биде строго санкционирано.
…
