На Плоштадот „Македонија“ во Скопје денес свечено беше отворена првата сезона на „Плазма Спортските игри за млади“, манифестација посветена на промоција на спортот, дружењето и здравите животни навики кај младите.
На отворањето присуствуваше и премиерот Христијан Мицкоски, кој во своето обраќање истакна дека спортот има важна улога во развојот на младите генерации и во градењето на вистински вредности.
Тој порача дека учесниците низ годините ќе се сеќаваат на моментите поминати на спортските терени, нагласувајќи дека покрај натпреварувањето, подеднакво важни се и дружењето, тимскиот дух и стекнувањето нови искуства.
„Спортувајте, другарувајте и учете, затоа што спортот е иднината на нашата татковина Македонија“, истакна Мицкоски.
Премиерот додаде дека Владата и во иднина ќе продолжи да го поддржува спортот и младите, со цел создавање подобри услови за развој на спортската култура и поттикнување на младите активно да се вклучуваат во спортски активности.
„Нека е со среќа, нека е успешно и нека победи подобриот“, порача Мицкоски на отворањето на спортските игри.
…
