Јапонија започнува нова научна иницијатива што може да означи значаен чекор во глобалната потрага по вонземска интелигенција. Формирано е првото национално здружение посветено на SETI (Search for Extraterrestrial Intelligence), со планови за конкретни радиоастрономски набљудувања кои би можеле да започнат уште следното лето.
На чело на проектот стои астрофизичарот Шиња Нарусава, кој со ентузијазам истакнува дека идејата повеќе не е само теоретска амбиција, туку иницијатива што конечно добива практична форма. Според него, веројатноста дека човештвото е единствената интелигентна цивилизација во Универзумот е мала, па затоа научната потрага мора да се интензивира.
Здружението, кое започна да се организира во април, веќе обедини десетина астрономи и истражувачи од различни опсерватории. Првата заедничка кампања е планирана за август следната година и ќе биде насочена кон регионот на соѕвездието Стрелец, при што набљудувањата ќе се изведуваат од опсерваторијата Мисато во западна Јапонија.
Овој датум не е избран случајно — тој се совпаѓа со 50-годишнината од едно од најзагадочните откритија во историјата на радиоастрономијата, т.н. „Wow!“ сигнал. Станува збор за краток, но исклучително силен радиоимпулс регистриран во 1977 година од телескоп на Државниот универзитет во Охајо, кој доаѓал токму од правецот на Стрелец. И покрај децениските анализи, неговото потекло сè уште не е целосно објаснето, а дел од научната заедница го смета за еден од најсериозните кандидати за можен вонземски пренос.
Новоформираната јапонска група планира да оди чекор подалеку од еднократни набљудувања. Нивната амбиција е создавање домашна мрежа на радиоантени што ќе овозможи континуирано следење на небото. Според нив, токму долгорочниот мониторинг е клучот за зголемување на веродостојноста на секој иден сигнал.
„Целта ни е да изградиме инфраструктура во Јапонија што ќе може да се мери со водечките светски SETI програми,“ истакнува Нарусава. Тој додава дека проектот има и поширока димензија: не само научна, туку и филозофска. Според него, размислувањето за можноста за други цивилизации во вселената треба да го поттикне човештвото да ја преиспита сопствената позиција и односите на Земјата, каде што конфликтите меѓу луѓето сè уште се реалност.
…
