За време на состанокот на шефовите на дипломатиите на земјите членки на Европската унија во Брисел, новоименуваната бугарска министерка за надворешни работи, Весислава Петрова-Чамова, испрати јасна порака дека европската перспектива на Северна Македонија останува условена од спроведување на преземените обврски од 2022 година.
Таа, по првите официјални разговори со македонскиот министер за надворешни работи Тимчо Муцунски, нагласи дека Софија веќе не го третира ова прашање како билатерален спор, туку како дел од пошироката динамика меѓу Европската унија и државите кандидати за членство.
Петрова-Чамова порача дека Бугарија останува на својата јасна позиција и очекува Скопје да покаже конкретна политичка волја за придвижување напред во евроинтегративниот процес. Според неа, отворањето на „европскиот прозорец на можности“ во наредниот период ќе зависи токму од исполнувањето на договореното.
Во нејзината изјава беше нагласено и дека секое одложување или недоследност во спроведувањето на преземените обврски може да ја чини земјата губење на моментумот во проширувањето на Унијата, кое, како што рече, повторно добива на интензитет.
Софија, додаде таа, очекува јасни и видливи чекори од македонска страна кои би ја потврдиле подготвеноста за реален напредок кон членство во Европската унија.
…
