Иран би можел да направи сериозен чекор кон нуклеарната ескалација доколку дојде до нова воена конфронтација со САД, предупредуваат од Техеран.
Пратеникот Ебрахим Резаи, кој е и портпарол на парламентарниот Комитет за национална безбедност и надворешна политика, изјави дека во иранскиот парламент веќе се разгледуваат низа „стратешки опции“ како одговор на евентуален американски напад. Меѓу најдрастичните сценарија, како што посочи, се наоѓа и можноста за збогатување ураниум до 90 проценти, ниво што се смета за прагот потребен за изработка на нуклеарно оружје.
„Доколку се соочиме со нова агресија, една од опциите што ќе бидат ставени на маса е и зголемување на збогатувањето до 90 проценти. Тоа прашање ќе биде предмет на парламентарна анализа“, наведе Резаи.
Вообичаено, цивилните нуклеарни програми користат ураниум збогатен меѓу 3 и 5 проценти, додека за воени цели нивото достигнува околу 90 проценти, што ја прави ваквата најава особено чувствителна на меѓународната сцена.
Изјавата доаѓа во период на засилени тензии, по медиумски извештаи дека во Вашингтон се разгледуваат нови можни воени акции против Иран со цел, како што се наведува, да се намали неговата преговарачка позиција. Американскиот претседател Доналд Трамп, според тие информации, останува на ставот дека Иран не смее да дојде во позиција да развие нуклеарно оружје.
…
